د ټونس چارواکي وایي، مدیترانې سمندر کې د کډوالو د یوې وړې بیړۍ له ډوبېدو وروسته د شلو کسانو مړي موندل شوي دي.
دغه پېښه نن د ډسمبر په ۲۴مه شوې او کډوالو هڅه کوله چې اروپا ته ځانونه ورسوي.
د بیړۍ د ډوبېدو له پېښې پنځه تنه ژوندي ژغورل شوي او مسولین د شااوخوا شلو نورو کسانو چې ګمان کېږي ورک به وي، د پلټنې هڅې کوي.
د ټونس د ساحلي ساتونکو یوه ویاند ویلي، وژل شوي تر ډېره د افریقا د سب سهارا اوسیدونکي وو.
ژغورل شوېو کسانو ویلي چې بیړۍ کې د پنځوسو په شااوخوا کې کډوال سپاره وو او دوی د ایټالیا په لور روان وو.