د امریکا د متحد ایالاتونو لوی څارنوال ویلیام بار له فدرالي څارنوالانو غوښتي دي چې د ولسمشرۍ په ترسره شویو انتخاباتو کې د بې نظمیو د ادعاو څیړنه وکړي.
دا غوښتنه د دې سربېره شوې ده چې تراوسه د نوومبر د درېیمې نېټې په انتخاباتو کې د درغلیو شواهد نه شته.
ډونالډ ټرمپ چې په دې ټاکنو کې یې له خپل سیال جوبایډن څخه ماتې خوړلې ده، ادعا کوي چې درغلۍ شوې دي.
د امریکایي رسنیو په استناد په عدليې وزارت کې د انتخاباتي جرمونو د څانګې مشر په ایمیل کې خپله استعفا وړاندې کړې ده.
منتقدینو او ډیموکراتانو د امریکا لوی څارنوال چې د اوسني ولسمشر ډونالډ ټرمپ له نژدې مدافعانو څخه دی، تورن کړی دی چې د خپلې دندې پرمهال یې څوځله هڅې کړي دي چې عدلي سیسټم سیاسي کړي.
د جوبایډن انتخاباتي ټیم چې د ۲۷۰ الکټرول کالج ټاکنیزو راییو په ترلاسه کولو په انتخاباتو کې ګټونکی اعلان شوی، ویلیام بار تورن کړی دی چې هڅه کوي د ټرمپ بې بنسټه ادعاوې ثابته کړي.