په کابل کې د امریکا سفارت شارژ دافیر راس ویلسن د جنرال مېلر له دریځه چې له طالبانو یې د تاوتریخوالي د کمښت غوښتنه کړې، کلک ملاتړ کړی دی.
کابل کې د امریکا سفارت شارژ دافیر راس ویلسن افغانستان کې د بهرنیو ځواکونو د عمومي قومندان، جنرال مېلر له دریځه چې له طالبانو یې د تاوتریخوالي د کمښت غوښتنه کړې، کلک ملاتړ کړی دی.
هغه پر خپلې ټویټر پاڼې ليکلي، چې باید د جګړې د ښکېلو غاړو لهخوا دایمي سولې ته د رسېدو لپاره د تاوتریخوالیو لړۍ ودرول شي.
(1/2) I strongly second Gen. Miller’s call for the #Taliban to stop its offensive in #Helmand and reduce its violence around the country. This violence, which is not consistent with the U.S.-Taliban agreement, leads only to unacceptable loss of life and destruction. https://t.co/qsMjVQ9LIQ
— Chargé d’Affaires Ross Wilson (@USAmbKabul) October 13, 2020
په افغانستان کې د غوڅ ملاتړ ماموریت په چوکاټ کې د امریکايي ځواکونو عمومي قوماندان سکاټ مېلر له طالبانو غوښتي، چې سمدستي پر هلمند باندې خپل تعرضي برید ودروي.
دا په داسې حال کې ده، چې د دوشنبې په ورځ په افغانستان کې امریکايي ځواکونو تایید کړه چې دوی په تېرو دوو ورځو کې په هلمند کې د طالبانو پر مرکزونو هوایي بریدونه کړي دي.
بلخوا په افغانستان کې د اروپايي ټولنې سفیر وون برنډیټ په هلمند کې د جګړې د درېدو غوښتنه کړې ده.
وون برنډیټ تازه په خپل ټویتر پاڼه لیکلي، چې په تېرو ۴۸ ساعتونو کې د اروپايي ټولنې د بشري مرستو رسولو له لارې د جګړې له ۷۵ ټپیانو او دغه شان له ۴۰۰۰ بېځایه شویو کورنیو سره مرستې شوي دي.
دوه ورځې وړاندې طالبانو د هلمند په مرکز لشکرګاه له بېلابېلو خواوو بریدونه وکړل، چې له امله یې طالبانو د باباجي سیمه ونیوله، په یو شمېر نورو برخو کې یې هم جګړې شوې چې د سیمهییزو چارواکو په وینا، تر ۵۰۰۰ زیاتې کورنۍ د دغو جګړو له امله له خپلو کورونو بې ځایه شوې دي.
د هلمند امنیه قومندانۍ که څه هم په دغه جګړه کې ملیکانو او افغان ځواکونو ته د اوښتو تلفاتو په اړه څه نه وايي، خو زیاتوي، چې د لښکرګاه په جګړه کې شااوخوا ۱۷۰ طالب جنګیالي وژل شوي دي.
وسلهوالو طالبانو تر اوسه د خپلو وژل شویو کسانو کره شمېر نهده په ډاګه کړی.
د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد مخکې تر دې ویلي و، چې د امریکا او طالبانو تر منځ په دوحه کې د شوې هوکړې پر بنسټ به طالبانو په لویو ښارونو حملې نه کوي.
زلمی خلیلزاد
بل پلو د طالبانو ویاند ذبیحالله مجاهد ویلي چې دوی یوازې د هلمند په هغه سیمو حملې کړي چې مخکې د دوی په واک کې وې او افغان ځواکونو نیولي دي، هغه ادعا چې افغان حکومت یې ردوي.