د افغانستان د خصوصي او عامه مشارکت په عنوان په دوبۍ کې یوه نړیواله سوداګریزه ناسته پیل شوه.
د مالیې وزارت ویاند شمعروز مسجدي نن ازادي راډيو ته وویل، چې د یادې ناستې په پرانیستونکې وینا کې د مالیې سرپرست وزیر عبدالهادي ارغندیوال بهرني پانګه وال وهڅول څو په افغانستان کې پانګونه وکړي.
نوموړي وویل، چې د ناستې هدف دا دی چې افغانستان ته نړیوالې پانګونې را جلب شي.
هغه زیاته کړه: "یاده ناسته کې په دې خبرې کېږي چې د سولې په راتلو سره د عامه او ګډې پانګونې لپاره کوم فرصتونه موجود دي."
دغه دوه ورځنۍ ناسته چې د حرکت موسسې لخوا جوړه شوې د شاوخوا ۴۰ هېوادونو استازي او ۲۵۰ سوداګرو په کې ګډون کړی.
نوموړي وویل، چې په یاده ناسته کې د سوداګرۍ پر فرصتونو بحث کېږي.
دا په داسې حال کې ده چې تردې وړاندې د نا امنیو له امله اکثره پانګه وال خپلې پانګې له هېواده بهر ایستلي دي.