په یونان کې د کډوالو په یوه کمپ کې د اورلګېدو له امله په سلګونو افغانان بېسرپناه شوي دي.
دا اور د لیسبوس په ټاپو کې د چهارشنبې په شپه ولګېد.
روېټرز اژانس په یونان کې د کډوالو د چارو د مقاماتو په وینا خبر ورکړ چې د موریا کمپ چې ۱۲ زره کډوال پهکې اوسېدل یو مخ تخریب شوی دی.
په دې کمپ کې د استوګنو افغانانو کره شمېره نهده څرګنده.
د یونان د کډوالو چارو وزیر ویلي دي د هغو شااوخوا درې زره کډوالو لپاره به چې له دې پېښې اغېزمن شوي دي موقتي خېمې ودروي.
د دې اورلګېدو علت تر اوسه نهدی روښانه شوی.
د ملګرو ملتونو د کډوالو چارو عالي کمېشنري ( یو.اېن.اېچ.سي.ار) مخکې ویلي و چې د یونان په ټاپوګانو کې د مېشتو کډوالو نیمایي افغانان دي.