د پنجشېر ولایت چارواکي تأییدوي چې وسلهوالو خلکو د بازارک په سنګانه سیمه کې یو شمېر افغان ځواکونه محاصره کړي دي.
د پنجشېر مرستیال والي محمد امین صدیقي دا خبره ازادي راډیو ته تأیید کړه.
هغه وویل د پنجشېر د ځواکونو د همغږۍ له مرکزه بازارک ته یو شمېر عسکر لېږل شوي و چې د سیمې قهرجن خلک ارامه کړي، خو د سیمې شااوخوا ۲۰۰ اوسېدونکو چې اکثر یې وسلې لري دا عسکر ایسار کړي.
صدیقي وویل د عسکرو د راخوشې کولو لپاره هڅې روانې دي.
د بازارک د سنګانه کلي اوسېدونکي د کرامالدین کریم د نیولو لپاره د ځانګړو ځواکونو د عملیاتو په غبرګون راوتلي و.
د افغانستان د کورنیو چارو وزارت ځانګړو ځواکونو د افغانستان د فوټبال فدراسیون د پخواني مشر کرامالدین کریم د نیولو لپاره بېګا په پنجشېر کې عملیات وکړل چې بېنتیجې پای ته ورسېدل.
د راپورونو په اساس د کرامالدین کریم د نیولو د مخنیوي لپاره ټولو شویو خلکو له افغان ځانګړو ځواکونو سره ډزې هم تبادله کړي، خو تر اوسه د چا د ژوبلېدو خبره نهده تأیید شوې.
له دې چې خلکو لار تړلې وه دا ځانګړي پولیس د خاواک کوتل له لارې د بغلان اندراب ته وتلي دي.
کرامالدین کریم د فوټبال فدراسیون مخکېنی مشر دی چې د فوټبال د ښځینهوو ملي ټیم د ځینو لوبغاړو په جنسي ځورونې تورن پېژندل شوی.
محکمې د هغه د نیولو حکم ورکړی.
کریم په خپله او د هغه وکیلانو لګېدلي تورونه رد کړي.