د ملګرو ملتونو مرستندویه مأموریت یوناما ویلي په خواله رسنیو د وېډیوګانو له مخې چې ظاهراً ښکاروي افغان پوځیان د طالبانو له مړو سره ناوړه چلند کوي، ډېر ټکان ورکوونکی دی.
یوناما پرون په خپل ټویټر زیاته کړې دا چې د افغانستان دفاع وزارت په دې اړه د تحقیقاتو د پيل خبره کړې هیله ده دا څېړنې چټکې او ازادې وي.
Footage posted today on social media purporting to show #Afghanistan Army personnel mutilating Taliban corpses is deeply shocking. Announced @MODAfghanistan investigation needs to be swift and open. If crimes are proven the criminals must be identified and held responsible.
— UNAMA News (@UNAMAnews) August 13, 2020
په افغانستان کې د ملګرو ملتونو مرستندویه مأموریت ټینګار کړی که چېرته جرم ثابت شي باید مجرمین وپېژندل شي او حساب کتاب ورسره وشي.
د افغانستان دفاع وزارت پرون اعلان وکړ په ټولنیزو شبکو کې د خپرې شوې وېډیو په اړه چې ظاهراً امنيتي سرتېري له نیول شویو جسدونو سره ناوړه چلند کوي، خبر شوي.
دفاع وزارت ویلي دا موضوع په جدي توګه څېړي او که ثابته شي دا د ملي اردو منسوبین دي د افغانستان له قوانینو سره سم به له سرغړوونکو سره چلند وشي.
د طالبانو ډلې هم د افغانستان د پوځ په لاس د خپلو جنګیالیو له مړو سره په ناوړه چلند جدي اعتراض کړی دی.