وروسته له هغې چې د امریکا متحدو ایالتونو په هیوسټن ښار کې د چین کونسلګرۍ د تړلو امر وکړ، د چین له خوا د ځوابي اقدام په توګه په چنګدو کې د امریکا کونسلګرۍ وتړل شوه.
د چین دولتي ټلویزیون داسې انځورونه خپاره کړي چې ښيي نن سهار وختي په چنګدو کې د امریکا بیرغ له کونسلګرۍ راکښته کېږي او د کونسلګرۍ کارکوونکي هڅه کوي چې نن دوشنبه، تر ورکړل شوي مهلت مخکې ودانۍ پاکه کړي.
د امریکا د متحدو ایالتونو د بهرنیو چارو وزارت وویل په چنګدو کې د امریکا کونسلګرۍ خپل فعالیتونه ځنډولي دي.
دغه وزارت په دې اړه د خواشینۍ څرګندولو سره ویلي، د چین په سویل لوېدیځ کې دغه کونسلګرۍ له ۳۵ کلونو راهیسې د تبتیانو په ګډون د چین د لوېدیځ له خلکو سره زموږ د اړیکو مرکز و.
امریکایي ډیپلوماتان د چین په سویل لویدیځ چنګدو کې له کونسلګرۍ په وتو دي.
دا وروسته له دې چې چین د دغه ډیپلوماتیک ماموریت د تړلو امر وکړ.
په تېرو دوو ورځو کې ځايي اوسېدونکي د ودانۍ شا و خوا راټول شوي وو، د چین بیرغ یې رپاوه او سیلفي عکسونه یې اخیستل.
تر دې مخکې د واشنګټن په امر د جولای پر ۲۴ مه، د امریکا د ټکزاس ایالت په هیوسټن ښار کې د چین له کونسلګرۍ چینايي ډیپلوماتان ووتل.
د امریکا د بهرنیو چارو وزیر مایک پومپیو تور پورې کړی چې چین له دغې کونسلګرۍ د معنوي مالکیت د غلا او جاسوۍ لپاره کار اخیست.
د امریکا د بهرنیو چارو وزیر مایک پومپیو
د چین د بهرنیو چارو وزارت ویلي، په چنګدو کې د امریکا د کونسلګرۍ تړل کېدل، د امریکا د متحدو ایالتونو د غیرمسوولانه اقداماتو په وړاندې یو مشروع او اړتیا وړ اقدام و.
د واشنګټن او پیکنګ ترمنځ له وړاندې خرابې شوې اړیکې وروسته له هغې لا ترینګلې شوې، چې دواړو هېوادونو د بالمثل اقدام په توګه د یو بل کونسلګرۍ وتړله.
امریکايي چارواکو تېره اوونۍ وویل، یوه سینګاپوري سړي خپل جرم منلی چې په امریکا کې یې د چین استخباراتي ادارو ته د غیرقانوني اجنټ په توګه فعالیت کاوه.
امریکايي چارواکو دغه راز په ویزو کې د درغلۍ او ویزې ته د درخواست ورکولو پر مهال د چین د خلکو د ازادۍ له پوځ سره د خپلو اړیکو پټولو په تور، څلور چینايي څېړونکي نیولي دي.
د نړۍ د لویو اقتصاد لرونکو هېوادونو د امریکا د متحدو ایالتونو او چین ترمنځ اړیکې د چین له خوا د کرونا وبا د مدیریت، د هانک هانګ د حقونو او ازادۍ د محدودیت، تجارتي لانجو او نورو کړکېچونو له کبله ترینګلي شوي دي.
واشنګټن د چین په شین جیانګ سیمه کې له بشري حقونو د سرغړونو له کبله پر چین فشارونه زیات کړي دي.
په دغه سیمه کې چین تر یو ملیون زیات اویغور مسلمانان او د خلکو نورې ډلې په موقتي کمپونو یا هم زندانونو کې راغونډ کړي دي.