د متحده ایالتونو پوځ روسیه تورنه کړې چې لیبیا ته یې اضافي یرغلیزې وسلې او جنګیالي استولي دي.
د امریکا د پوځ په وینا روسیه هڅه کوي چې لیبیا کې ځان ته د پښې ځای پیدا کړي.
په افریقا کې د امریکا د پوځ قومندانۍ پر روسیې دا تور پرون پورې کړ.
پر روسیې دا تور په داسې حال کې لګول شوی چې په لیبیا کې ښکېلې خواوې د سِرت د ساحلي ښار د کنترول لپاره یو بل سره په جګړه بوختې دي.
پنټاګون داسې تصویرونه خپاره کړي چې په وینا یې، د روسیې له خوا د واګنر ډلې ته د تجهیزاتو د استولو دوام ښيي.
واګنر د روسیې یو خصوصي پوځي شرکت او په لیبیا کې فعال دی.
د پنټاګون په وینا د روسیې په باروړونکو الوتکو کې د واګنر جنګیالیو ته د جنګي جیټ الوتکو، زغروالو ګاډو، لاریو او د هوايي دفاع د تجهیزات لېږد لا هم روان دی.
پنټاګون تر دې مخکې هم مسکو لیبیا ته د جیټ الوتکو په استولو تورن کړی او د دې میاشتې په پیل کې ویلي و، د واګنر ډلې د لیبیا د پلازمېنې طرابلس دننه او بهر ماینونه ایښي دي.
په افریقا کې د امریکا د پوځ قومندانۍ همدارنګه ویلي، روسیه د مدیترانې په سمندر کې د خپل اوږدمهالې حضور لپاره له واګنر نظامي شرکت د یوې نیابتي ډلې په توګه کار اخلي.