د ملي اردو دوه سرتېري د کابل په قره باغ ولسوالۍ کې ووژل شول.
د قره باغ ولسوال محمد حنیف صدیقي ازادي راډیو ته وویل، دغه سرتېري نن سهار دندې ته روان وو چې د قلعه موسی په سیمه کې موټر سایکل سپرو ډزې پرې وکړې.
د برید مسئولیت کومې ډلې نه دی منلی، خو د قرباغ ولسوال دا د طالبانو کار بولي.
بل لور ته د پکتیا چارواکي وایي، مرکز ګردیز کې نن یوې چاودنې پنځه تنه ټپیان کړل.
د پکتیا د امنیت امر لطف الله کامران ازادي راډیو ته وویل، چاودنه ماسپښین مهال د ګردېز ښار د دوهمې امنیتي حوزې اړوند د کابل ګردیز په عمومي سرک هغه مهال وشوه چې د ملي اردو کاروان له سیمې تېرېده.