ټاکل شوې چې د فرانسې ولسمشر ایمانویل مکرون او د جرمني صدراعظمه انګېلا مېرکل به نن مخکې تر دې چې اروپایي ټولنه له کرونا ویروس څخه د اقتصاد د رغولو د مالي مرستو پر یوې بستې خبرې وکړي، سره وګوري.
دا به د مکرون او مېرکل ترمنځ له هغې وروسته چې د کرونا وبا خپره شوې، لومړی ځل مخامخ کتنه وي چې نن په برلین کې ترسره کېږي.
د مکرون دفتر وویل، جرمني چې د ۲۰۲۰ کال له نیمایي، د اروپایي شورا دوره یي مشري په غاړه اخلي، دغه کتنه د دوی د نژدې همغږۍ څرګندونه کوي.
د فرانسې ولسمشر تېره میاشت د کرونا وبا د خپریدو له امله د اروپا د ځپل شوي اقتصاد د رغولو لپاره د پنځه سوه میلیارډ ایرو د یوه پلان وړاندیزکړی و.