تمه ده چې د خوست د غلام خان مهم تجارتي بندر سبا پرانیستل شي.
افغان ولسمشر اشرف غني تېره اوونۍ د خوست والي ته د دې بندر د پرانیستو لارښوونه وکړه او نن رسنیو د پاکستاني چارواکو په حواله راپور ورکړی چې دا لاره سبا د چنګاښ په دوهمه د دواړه اړخیزې سوداګرۍ پرمخ پرانیستل کېږي.
غلام خان له تورخم او سپین بولدک وروسته د هېواد درېیم لوی بندر دی چې چارواکي یې د پرانیستو خبر ورکوي.
افغان چارواکي وايي، د غلام خان لاره د پاکستان ستر سوداګریز بندر کراچۍ ته د نورو لارو پرتله نږدې ۴۰۰ کیلومتره لنډه ده.