په پکتیا کې د کانونو او صنعت خونې مسئولین وایي، چې د دې ولایت د ډنډ پټان ولسوالۍ د غیر رسمي سوداګریزې لارې له بندیدو وروسته د دې ولایت سوداګر له ګڼو ستونزو سره مخ شوي.
د دې خونې مشر فضل الدین جلالزی نن ازادي راډیو ته وویل، چې له تېرو دریو میاشتو راهیسې په دې لاره سوداګریزې چارې په ټپه درېدلي، چې له امله په بازار کې د یو شمېر توکو د کموالي تر څنګ د توکو په بیو کې هم لوړوالی راغلی.
دوی وایي، که څه هم د دې لارې د ټرانزیټ لپاره یې څو ځلې ولایتي ادارې او مرکز ته وړاندیزونه کړي، خو تر اوسه یې چا غږ نه دی اوریدلی.
خو د پکتیا سیمه ییز چارواکي وایي، د ډیورنډ فرضي کرښې دې غاړې ته د دې سوداګریزې لارې د رسمي کېدو او ټرانزیټ لپاره ټول تیاری بشپړ شوی او د ولسمشر له هدایت سره سم یې خپلې چارې بشپړې کړي او د ولسمشر د اقتصادي لید لوري له تعقیب سره سم به له پاکستاني لوري سره په راتلونکو ناستو کې د دې لارې په رسمي ټرانزیټ هم خبرې وشي.