نن به په ایران کې ټولو جوماتونو ته په موقت ډول د بیا پرانیستل کېدو اجازه ورکړل شي.
دا د کرونا ویروس د خپرېدو د مخنیوي په هدف د لګول شویو محدودیتونو د نرمولو بل اقدام ګڼل کېږي.
د ایران دولتي خبري اژانس د ایران د اسلامي تبلیغاتو د سازمان د مشر محمد قمي په حواله راپور ورکړی چې وايي د جوماتونو د بیا پرانیستل کېدو پرېکړه له روغتیا وزارت سره په مشوره شوې ده.
ښاغلي قمي وروسته وویل چې جوماتونه به یوازې د درېیو ورځو لپاره د روژې مبارکې میاشتې د ځانګړو شپو د درناوي لپاره پرانیستي وي.
په منځني ختیځ کې ایران له هغو هېوادونو دی چې کرونا ویروس سخت ځپلی دی.
که څه هم د ایران په ځینو برخو کې د دغه ویروس خپرېدل په زیاتېدو دي، خو دغه هېواد د محدودیتونو کمول پیل کړي دي.
په ایران کې په کرونا ویروس تر پرون پورې د مړینو شمېر ۶،۶۸۵ ته رسېده او په دې ویروس د اخته کسانو شمېر تر یو لک او ۹،۲۸۶ کسانو پورې رسېږي.