د ناټو سازمان عمومي منشي ینس سټولټنبرګ په طالبانو غږ وکړ چې بریدونه ودروي او له امریکا سره تړون پوره عملي کړي.
سټولټنبرګ دا خبرې نن سه شنبه په هغه ویډیويي کنفرانس کې وکړې چې د ناټو غړیو هېوادونو د دفاع وزیرانو تر یوې غونډې مخکې جوړ شوی و.
هغه زیاته کړه: "د طالبانو بریدونه زیان اړوي نو په طالبانو غږ کوو چې بریدونه ودروي څو د امریکا متحده ایالتونو او طالبانو تر منځ هوکړه پوره عملي او تاوتریخوالی کم شي، ځکه دا د سوله ییز حل لارې لپاره یې یواځینۍ لار ده، موږ قویاً د ټولو هغو هڅو ملاتړ کوو چې بین الافغانی خبرې پيل شي."
د طالبانو او امریکا تر منځ د تړون په اساس دا ډله ژمنه ده چې تاوتریخوالی کم کړي خو د افغانستان امنیتي او دفاعي ارګانونو ویلي چې طالبانو په وروستیو څو ورځو کې بریدونه لا پسې زیات کړي.
ینس ستولتنبرګ دغه راز وویل: "ناټو به له افغانستان سره خپل تعهد پر ځاي وساتي، دا تعهد به د غوڅ ملاتړ ماموریت، د افغانانو دروزنې اومالي ملاتړ له لارې عملي کوو ځکه موږ باور لرو چې د سولې له بهیر سره دمرستې تر ټولو غوره لار د افغانانو ملاتړ دی څو طالبان وپوهېږي چې هغوي به یې هېڅ کله د جګړې په ډګر کې ونه ګټي، هغوي باید د مذاکرو پر مېز کېني او په حقیقي ډول جوړجاړی وکړي."
ناټو داسې وخت له طالبانو د تاوتریخوالي د کمېدو غوښتنه کړې چې پرون په دوحه کې د افغان سولې لپاره د امریکا خاص استازي زلمي خلیلزاد او د بهرنیو ځواکونو عمومي قومندان جنرال سکاټ مېلر د امریکا-طالبانو د تړون د عملي کولو اړوند مسایلو په اړه د طالبانو د سیاسي دفتر له مشر ملا عبدالغني برادر سره خبرې کړي.