په ایران کې په تېرو ۲۴ ساعتونو کې په کرونا ویروس د اخته کېدو له کبله ۱۱۷ کسان مړه شول چې له دې سره د ټولو مړو کسانو شمېر ۴۵۰۰ ته نژدې شو.
د ایران د روغتیا وزارت ویاند کیانوش جهانپور نن یکشنبې وویل په یوه ورځ کې د کرونا ویروس ۱۶۵۷ نوي موارد ثبت شوي چې له دې سره د مثبتو مواردو ټول شمېر ۷۱۶۸۶ ته ورسېد.
روسیې هم د ۲۲۰۰ نویو مثبتو پېښو خبر ورکړی.
د دې وبا له خپرېدو وروسته په روسیه کې په یوه ورځ په دې ویروس د اخته کېدو تر ټولو لوړه شمېره ده.
په روسیه کې د کرونا ویروس د مثبتو پېښو ټوله شمېره تر اوسه ۱۵۷۷۰ او له دې کبله د مړو شمېره ۱۳۰ ته رسېدلې.
خو په دې هېواد کې دننه او بهر منتقدان وايي، مسکو په دې ناروغۍ د اخته کسانو او مړو حقیقي شمېرې نه ښيي.