طالبان وايي چې نن به له خپلو زندانونو څخه ۲۰ تنه بندیان خوشې کړي.
په قطر کې د طالبانو د سیاسي دفتر ویاند سهیل شاهین پر ټویټر په یوه بیان کې ویلي چې د افغان حکومت اړوند دا ۲۰ تنه بندیان به له زندان څخه تر خوشې کېدو وروسته په کندهار کې د سره صلیب ادارې ته وسپارل شي.
نن به د اسلامي امارت لخوا د کابل ادارې شل تنه بندیان له زندان څخه خوشې او د کندهار په ولایت کې د سره صلیب ادارې ته وسپارل شي.امروز بیست تن از زندانیان اداره کابل از زندان رها و در ولایت قندهار به اداره صلیب سرخ سپرده خواهد شدند.
— Suhail Shaheen (@suhailshaheen1) April 12, 2020
نن له دې مخکې د افغانستان حکومت سل نور طالب بندیان له بنده خوشې کړل.
د افغانستان د ملي امنیت شورا ویاند جاوېد فیصل وايي، دا بندیان د ولسمشر د فرمان پر اساس د هغو روغتیايي وضعیت، عمر او د قید پاتې مودې ته په کتو د سولې د هڅو د یوې برخې او د کرونا ویروس د خپرېدو د مخنیوي لپاره خوشې شوي خو طالبانو ویلي و، چې دا بندیان د دې ډلې کسان نه دي.
افغان حکومت تر اوسه په دریو جوپو کې ټول ۳۰۰ طالب بندیان خوشې کړي دي.