دولتي چارواکي خبر ورکوي چې د غزني ولایت په اندړو ولسوالۍ کې په هوايي بمبار کې ۱۶تنو وسله والو ته مرګ ژوبله اوښتې ده.
د ولایت مقام د مطبوعاتو مرستیال سمیر احمد احمدي د جمعې په ورځ ازادي راډیو ته وویل: "تېره شپه د یادې ولسوالۍ په ملاح نوح بابا، عاشقوالو او ابو کلا سیمه کې د امنتي ځواکونو او وسله والو طالبانو ترمنځ جګړه رامنځ ته شوې چې سیمه ته هوايي ځواکونه رسیدلي او بمبار یې کړی دی.
دی وايي د بمبار له امله ۷ تنه وسله وال طالبان وژل شوي او ۹ تنه نور ټپیان دي.
وسله والو طالبانو تر دې محاله په دې اړه څه نه دي ویلي.