روسیې د کرونا ویروس د مثبتو پېښو له زیاتېدو سره په نړیوالو الوتنو بندیز لا پراخ کړ.
تر نن سهاره په دې هېواد کې پر کرونا ویروس د اخته شویو کسانو شمېر ۳۷۶ ته ورسېد.
د روسیې دولتي اژانس روساویا وویل، د دغو نویو اقداماتو له مخې به د روسیې هوایي شرکتونه یوازې د مسکو له هوایي ډګر څخه هغه هم یوازې د نړۍ د نیویارک په څېر لویو ښارونو او د هېوادونو پلازمېنو ته الوتنې کوي.
دغهراز روسیه به په استثنایي توګه هغو چارټر الوتنو ته هم اجازه ورکوي چې په بهر کې بند پاتې شوي د دې هېواد وګړي انتقالوي.
تر اوسه شااوخوا دوه لکه روسان له هغو هېوادونو چې کرونا ویروس پهکې ډېر خپور شوی، بېرته خپل هېواد ته لېږدول شوي دي.
تر اوسه په روسیه کې د دغه ویروس له امله د مړینې خبر نهدی ورکړل شوی.