امریکا د کرونا وایروس په وړاندې د مبارزې لپاره نوي اقدامات کړي دي.
د امریکا لویو ښارونو د کرونا وایروس د مخنیوي لپاره د یو لړ ټولنیزو فعالیتونو د بندولو اعلان کړی دی.
نیویارک او لاس انجلس چې د امریکا لوی ښارونه ګڼل کېږي اعلان وکړ چې رسټورانتونه، بارونه، کلپونه او تیاترونه په موقت ډول بندوي.
د نیویارک ښاروال "بېل دي بلاسیو" وویل، دغه وایروس د دې ښار د اوسېدونکو په منځ کې چې په رسټوانتونو، بارونو او نورو ځایونو کې چې نږدې سره کېني، د همدغو نږدې ناستو له لارې په چټکۍ خپرېږي.
هغه زیاته کړه: "موږ باید دغه دود ودروو."
په نیویارک کې دغه بندیزونه تر نامعلوم وخته له سبا عملي کېږي، خو په لاس انجلس کې هغه سمدستي عملي کېږي او د روانې میاشتې تر پایه به دوام کوي.
د لاس انجلس ښار یوه څنډه
لاس انجلس دغهراز اعلان کړی چې سپورټي جمنازیمونه به هم بندېږي، خو نیویارک ويلي چې د دې ښار عمومي ښوونځي تړي.
په لاس وېګاس کې چې د کازینوګانو اصلي مرکز دی او هر کال له ۴۰ میلیونو زیات سیلانیان ورڅخه لیدنه کوي، ټولې کازینوګانې تر نامعلوم وخته تړل شوې دي.
میامي چې د امریکا یو مشهور تفرېحي ځای دی او د پسرلي په رخصتۍ کې محصلین ډېر ورځي، پولیسو یې سواحل تړلي دي.
د امریکا په پلازمېنه واشنګټن ډي سي کې اکثره موزیمونه او نور تفریحي ځایونه د روانې میاشتې تر پایه تړل شوي دي.
ډاکتر انتونیو فاوچي چې د عفوني ناروغیو متخصص دی وایي د کرونا وایروس د مخنیوي لپاره باید په ټوله امریکا کې د ۱۴ ورځو په مخه هر څه تړل شوي وی.
امریکا په اوس وخت کې په نړۍ کې د ډېرو کرونا ځپلو هېوادونو په ډله کې اتم ځای لري.
په دې هېواد کې ۳۷۷۴ کسان پر کرونا وایروس اخته شوي دي.
په اروپا کې ایټالیا چې له مخکې ټول ځایونه تړلي او د راپورونو له مخې اسپانیا او فرانسه هم په پام کې لري چې د روانې اوونۍ په پای کې ورته اقدامات اعلان کړي.
له چین وروسته چې د کرونا وایروس اصلي سرچینه ده، ایټالیا په نړۍ کې د کرونا د مثبتو پېښو دوهم ځای خپل کړی.
ایټالیا کې نږدې ۲۵ زره کسان پر دغه وایروس اخته شوي.
نږدې ۲۵ زره کسان پر دغه وایروس اخته شوي دي.
په اسپانیا کې ۸ زره او په فرانسه کې ۵ زره کسان پرکرونا اخته شوي دي.
په چین کې پر کرونا وایروس د اخته شویو کسانو شمېر له ۸۰ زرو اوښتی، خو دې هېواد ویلي چې د سختو تدابیرو په نتیجه کې یې اوس د دغه وایروس د چټکې خپرېدا مخه ډب کړې ده.
د کرونا وایروس خپرېدو چې د نړۍ پر بازارونو یې ډېر اغېز کړی، په امریکا کې به چې د نړۍ تر ټولو لوی اقتصادي قدرت دی، دغه نوي اقدامات د نړۍ پر اقتصاد لا منفي اغېز وکړي.
د اقتصاد د خوځښت او د بازارونو د پیاوړي ساتلو لپاره د امریکا فدرالي خزانې اعلان کړی چې سود به صفر ته راښکته کړي او د ارزښت پاڼو په رانیولو سره به ۷۰۰ میلیاره ډالره بازار ته عرضه کړي.