بلخ ولایت کې په کرونا په وایروس اخته کس له روغتونه تر تښتېدو وروسته بېرته روغتون ته را ګرځول شوی.
د افغانستان د عامې روغتیا وزارت ویاند وحید مایار وايي، چې هغه کس چې د کرونا وایروس ازمېښت یې مثبت پېژندل شوی، غوښتل یې د روغتون له قرنطین ځای نه وتښتي، خو د بلخ روغتون ته بېرته راوستل شوی.
د نوموړي په وینا دا مهال ناروغ کس تر درملنې لاندې دی.
کله چې په بلخ کې د کرونا یوه مثبت پېښه ثبت شوی، د ټولنیزو رسنیو کارکوونکو ولیکل، چې نوموړي کس غوښتل چې د طالبانو تر کنټرول لاندې سیمو ته وتښتي.
د طالبانو ویاند ذبیح الله مجاهد ازادي راډیو ته ویلي، که چېرې د کرونا په وایروس اخته کس د دوی تر کنټرول لاندې سیمو ته وتښتي، په بېرته ګرځېدو کې به یې اقدام وشي.
مجاهد همداشان وویل، دغه کس به د قرنطین لپاره د بلخ روغتون روغتیايي ټیم ته وسپارل شي.
بل خوا د افغانستان دعامې روغتیا وزارت وايي، که چېرې د کرونا په وایروس اخته کس له روغتونه وتښتي، نو پولیس باید په دې برخه کې همکاري وکړي.