افغان ولسمشر محمد اشرف غني به په دې اوونۍ کې لږترلږه زر تنه طالب بندیانو د خوشې کولو فرمان صادر کړي.
دا خبره د رویټرز خبري اژانس کړې او وايي چې لږترلږه پنځو سرچینو ورته د دې خبر پخلی کړی دی.
رویټرز خبري اژانس وايي، دوه افغان سرچینو وروته ویلي په دې فرمان کې به د طالبانو د ډېر عمر لرونکي بندیان شامل وي.
دا پرېکړه له هغې څو ساعته وروسته کېږي چې ولسمشر محمد اشرف غني د دویمې دورې ولسمشرۍ لوړه وکړه. د ولسمشر غني ویاندویانو په دې اړه له تبصرې کولو ډډه وکړه.
خو ولسمشر غني د دوشنبې په ورځ خپله د لوړې په مراسمو کې د طالبان بندیانو د خوشې کولو په اړه دې فرمان ته اشاره وکړه.
هغه زیاته کړه: "د طالب زندانیانو خوشې کېدل، د خلکو د امنیت او سولې له ټینګښت سره تړلي دي، په دې اړه به سبا یو فرمان صادر کړم چې د دې پروسې جزئیات به په کې شامل وي، له نیکه مرغه یو چوکاټ مو رامنځته کړی چې د زندانیانو د خوشې کېدو په بدل کې، په تاوتریخوالي کې د پام وړ کمی راځي."
طالبان د بین الافغاني خبرو تر پیل مخکې د افغانستان له زندانونو څخه د خپلو ۵ زرو بندیانو خوشې کېدل غواړي.
د طالبانو او امریکا ترمنځ تړون کې هم د دې بندیانو د خوشې کېدو مسئله یاده شوې ده.
ولسمشر غني تر دې مخکې د طالب زندانیانو خوشې کېدل په اوربند پورې تړلي وو.
ګومان کېږي چې د افغان حکومت له خوا د طالب زندانیانو خوشې کېدل به د طالبانو سره د افغان حکومت په ګډون بین الافغاني خبرو پیل ته لاره هواره کړي.