د ترکیې د دفاع وزیر ویلي، سوریه کې یې د حکومتي ځواکونو پر ضد عملیات په بریا سره روان دي.
هولوسي اکر د ترکیې انادولو دولتي اژانس ته ویلي، انقره هیڅ نیت او لیوالتیا نه لري چې له روسیې سره شخړه وکړي.
ترکیې داسې مهال په سوریه کې د پوځي عملیاتو د ګړندیتوب خبره کړې چې په دې وروستیو کې سوریه کې د ترکیې ۳۴ سرتېري ووژل شول.
له دې وړاندې د ترکیې ولسمشر رجب طیب اردوغان خپل روسي سیال ته ویلي و چې په سوریه کې دې ځان څنډې ته کړي.
د سوریې حکومتي ځواکونه، چې روسیه یې هوایي ملاتړ کوي، د ادلیب د نیولو لپاره عملیات کوي.
د ادلب زیاتې برخې د هغو وسله والو په لاس کې دي چې د ترکیې ملاتړ ورسره دی.