د کابل پولیس وایي، نامعلومه وسله والو تېره شپه دغه ښار کې په نشو روږدي ۹ کسان په ډزو وژلي دي.
د کابل د امنیې قومندانۍ خبرپاڼه وایي چې دغه پېښه د شپږمې امنیتي حوزې اړوند د قرغ غره په لمنه کې شوې.
خبرپاڼه کې راغلي چې د پیښې لامل او انګېزه لا معلومه نه ده او وژل شوي عدلي طب ته لېږدول شوي دي.
د کابل پولیسو په یوه جلا خبرپاڼه کې ویلي چې نن سهار د احمدشا بابا مېنې په نهم بلاک کې نامعلومه وسله والو د سړک سر یو صراف په ډزو وژلی دی.
په خبرپاڼه کې راغلي، د صراف پیسې نه دي غلا شوي او پېښه د پولیسو تر پلټنې لاندې ده.
کابل ښار کې دا جنایي پیښې داسې مهال کېږي چې څه موده وړاندې کورنیو چارو وزارت دغه ښار کې د دې ډول پیښو د مخنیوي لپاره د پراخو عملیاتو د پيل خبره کړې وه.