پرون د جمعې تر لمانځه وروسته په نوې ډيلي کې مسلمانان د ۱۷مې پېړۍ جوړ- جامع جومات شا او خوا راټول شول او د هند د تابعيت په قانون کې د بدلون پر ضد یې شعارونه ورکړل.
په زرګونو نور مظاهره چيان د پلازمېنې کوڅو ته راوتلي وو.
دوی ویل چې دغه قانون د مسلمانانو په وړاندې تبعیض دی او د هندوستان د سیکولر اساسي قانون پر خلاف دی.
د دې هېواد په نورو برخو کې هم ورته لاريونونه شوي دي.
په جنوبي ښار تیرووانانتاپورام کې هم زده کوونکي راوتلي وو.
د دې قانون پر ضد د هند په ختيځ کې د لویديځ بنګال ایالت مشرې (اعلی وزیرې) ممتا بینرجي هم په سیليګوري سیمه کې يوه لويه مظاهره وکړه.
په هند کې د ډیسمبر په دولسمه وروسته له هغه لاریونونه پیل شول چې پارلمان هغه قانون تصویب کړ چې د افغانستان، پاکستان او بنګله دېش هندوانو، سیکانو او پارسي وګړو ته د هندي تابعيت اخیستلو اجازه ورکوي.