د افغان سولې لپاره د امریکا خاص استازی زلمی خلیلزاد کابل ته راغلی او له افغان چارواکو سره ګوري.
د سولې په چارو کې د دولت وزارت ویاندې ناجیې انوري په خپله ټویټر پاڼه لیکلي افغانان د دوحې د روانو خبرو او همدارنګه په ټوله کې د سولې د بهیر په اړه د ښو خبرونو د اورېدو په تمه دي.
Mr. #Khalilzad is n Kabul right now, #Afghans expected to hear good news about the current negotiation in Doha and progress of #peace talks at all. We want to invest our time in the development of the country rather than war management and losing lives.
— Najia Anwari (@7Anajia) December 18, 2019
زلمی خلیلزاد د قطر له پلازمېنې دوحې کابل ته راغلی دی.
ده او د طالبانو د سیاسي ډلې غړو تېره شنبه خبرې پيل کړې وې او بیا په بګرام هوايي اډې د طالبانو د چهارشنبې برید په خاطر په خبرو کې دمه واخیستل شوه.
خلیلزاد په خبرو کې د دمې د اخیستلو اعلان کړی و او همیې ویلي و چې د بګرام د برید په خاطر یې له طالبانو سره په غونډه کې خپله غصه څرګنده کړه.
خلیلزاد لیکلي و چې طالبان دې په دې مهمې موضوع له خپلو مشرانو سره مشوره وکړي او ودې ښيي چې د سولې لپاره د افغانانو هیلې او غوښتنې ځوابولی شي.
د طالبانو د سیاسي دفتر ویاند سهیل شاهین بیا ازادي راډیو ته ویلي و چې دوی هم له خلیلزاد سره په خبرو کې د شپنیو عملیاتو او بمباریو مسئله یاده کړې وه او نیول شوې دمه کې دواړه لوري له خپلو مشرتابهوو سره مشوره کوي.