د امریکا د نړیوالو رسنیو فدرالي ادارې د "ډېوېد بُرک" په نوم د غوره ژورنالیزم جایزه پرون د نومبر په ۱۳مه، د زړورتیا لپاره د ازادې اروپا/ ازادي راډیو د افغانستان برخې ته ورکړه.
دا خپلواکه اداره په نړۍ کې د ډموکراسۍ او ازادۍ د ملاتړ لپاره معلومات خپروي او د خلکو ترمنځ د ارتباط ټینګولو هڅې کوي.
د دې ادارې پر وېبپاڼه لیکل شوي چې "ازادي راډیو ته د ډېوېډ بُرک جایزه ورکول کېږي، ځکه سره له دې چې د ۲۰۱۸ میلادي کال د اپرېل په ۳۰مه پر خبریالانو په خونړۍ حمله کې یې ژورنالېستان ووژل شول، له ستړیا پرتهیې د بېطرفه معلوماتو خپرولو ته دوام ورکړی دی."
په کابل کې په خونړۍ حمله کې د ازادي راډیو خبریالان سباون کاکړ، عبادالله حنانزی او د محرم درانۍ په نوم ځوانه خبریاله چې له ازادي راډیو سرهیې تازه کار پیل کړی و، ووژل شول.
د "ډېوېد" بُرک جایزه هر کال ژورنالېستانو ته د جرأت، خپلواکۍ او مسلکي فعالیت لپاره ورکول کېږي.
دا جایزه سږکال د امریکا غږ د کردي برخې خبریال فهیم عمر، د کیوبا لپاره د امریکا د خپرونو خبریال جو کاردونا، د ازادې اسیا راډیو د اویغوري برخې خپرونو او د منځني ختيځ نشراتي شبکې ته هم ورکړل شوه.
"ډېوېډ بُرک" له ۱۹۹۵ تر ۱۹۹۸ د نړیوالو رسنیو لپاره د امریکا فدرالي ادارې مشر و او د هغه د غوره خدمت د ستاینې لپاره هر کال د هغه په نوم دا جایزه ورکول کېږي.
- _______
عصمت څاروان د ازادي راډیو له ډایرکتر (رئیس) قادر حبیب سره د دې جایزې د اهمیت په اړه خبرې کړي.
د دغې مرکې د اورېدو لپاره لاندې لېنک کېکاږئ:
Your browser doesn’t support HTML5
د ډېوېډ بُرک جایزې په اړه د قادر حبیب مرکه