د افغانستان د ختیځ ولایت ننګرهار چارواکي وایي، په جلال اباد کې د ملي امنیت ځواکونو له خوا د څلورو وروڼو د وژل کېدو قضیې په تړاو د پلټنو لپاره یو حکومتي پلاوی له کابله ورغلی دی.
د ننګرهار والي شاه محمود میاخېل تېره ورځ ناوخته (د وږي په ۱۵مه) ازادي راډیو ته وویل، دغه پلاوی د لوی څارنوالۍ مرستیال جنرال شمس احمدزي په مشرۍ د جمعې په ورځ جلال اباد ته رسېدلی او خپلې څېړنې يې پيل کړي چې جزیات به یې وروسته له خلکو سره شریک شي.
د ملي امنیت د "صفر دوه" قطعې د تېرې چهارشنبې په شپه د ننګرهار د مرکز جلال اباد ښار په څلورمه ناحیه کې پر یوه کور چاپه ووهله او د عملیاتو په جریان کې یې څلور وروڼه ووژل چې د ډېرو خلکو غبرګونونه یې راوپارول.
وروسته د ننګرهار ولایتي ادارې له ولسمشر محمد اشرف غني او د ملي امنیت له شورا څخه وغوښتل چې د موضوع د څېړلو لپاره یو پلاوی وټاکي.
ښاغلي میاخېل وویل، ورغلي پلاوي د وژل شویو وروڼو د کورنۍ له غړو سره کتلي او خبرې یې کړي دی.
د دغې پېښې په غبرګون کې د افغانستان د ملي امنیت عمومي رئیس محمد معصوم ستانکزي له خپلې دندې استعفا وکړه او افغان ولسمشر محمد اشرف غني سمدستي ومنله.
ښاغلی ستانکزی له ۱۳۹۵ لمریز کال راهیسې د افغانستان د ملي امنیت عمومي رئیس و.
د دولتي ځواکونو په عملیاتو کې د ولسي خلکو وژل کېدو تل د خلکو اعتراضونه راپارولي دي.
ولسمشر اشرف غني د روان کال په غبرګولي کې د افغانستان امنیتي او دفاعي چارواکو ته امر وکړ چې د ولسي مرګ ژوبلې د مخنیوي لپاره لازم ګامونه پورته کړي، خو لا هم ښکاري چې دغه ستونزه پای ته نه ده رسېدلې.
- لویه څارنوالي ننګرهار ته د ملکیانو د وژنې د څېړلو په اړه پلاوی لېږي
- په جلال اباد کې د صفر دوه قطعې په عملیاتو کې ۴ وروڼه وژل شوي
- افغان ولسمشر د ملي امنیت د عمومي رئیس استعفا منظور کړه
په داسې حال کې چې د سولې خبرې روانې دي، افغانستان لا د جګړې خونړۍ ورځې تېروي.
د ملکي وکړو د خوندیتوب او عدالت غوښتنې ډلې هم د روان میلادي کال اګست میاشت د ملکي وګړو لپاره په تېرو څو کلونو کې تر ټولو خونړۍ میاشت ګنلې او ویلي یې دي چې په دغو وژنو کې د جګړې ټول ښکېل اړخونه شامل دي.
د ملکي وګړو د خوندیتوب او عدالت غوښتنې ډله له نړیوالې ټولنې غواړي چې په افغانستان کې د جګړې پر ښکېلو اړخونو فشار راوړي چې د ملکیانو د خوندیتوب مسئلې ته پام وکړي.
د دغې ډلې مشر عزیز احمد تسل پرون د جمعې په ماښام ازادي راډیو ته وویل چې په اګست میاشت کې د تېرې میاشتې په پرتله چې تر زرو زیات تلفات پکې موجود وو، هم ډېره وژنه شوې ده.
په کابل کې د اګست د اوومې د چاودنې د ځای یو انځور
د طالبانو ډله ییزو او ځانمرګو بریدونو او په ورته وخت کې د افغان حکومت پوځي عملیاتو د ولسي تلفاتو کچه لوړه کړې ده.
د ملګرو ملتونو د وروستي راپور له مخې چې د جولای په ۳۱مه خپور شو، د روان میلادي کال په لومړیو شپږو میاشتو کې ۱۳۶۶ ولسي وګړي وژل شوي چې له درېیو یوه برخه یې ماشومان دي او ۲۵۰۰ نور ټپیان شوي.
ملګرو ملتونو د لومړي ځل لپاره د دولتي ځواکونو عملیاتو کې د ولسي مرګ ژوبلې کچه د مخالفینو په بریدونو کې تر اوښتې مرګ ژوبلې ډېره وبلله، خو دولت د ولسي تلفاتو په برخه کې د ملګرو ملتونو راپور غیر واقعي وباله.