په بريتانيا کې لسګونه زره کسان لارو سړکونو ته په مظاهرو راووتل.
دوى د صدراعظم بوريس جانسن پر هغه جنجالي اقدام اعتراض کړی چې له اروپايي ټولنې د بريتانيا د وتلو په درشل کې يې د بريتانيا د پارلمان د تعليق غوښتنه کړې.
په زرګونو کسان پرون د لندن سړکونو ته راووتل او ګڼو اعتراض کوونکو شعار ورکاوه: بوريس جانسنه، شرم درته په کار دى.
د مظاهرې يوې برخه والې چې نوم يې نه دى اخيستل شوى، رويټرز خبري اژانس ته وويل: په هغه شکل چې بوريس جانسن او د هغه حکومت هڅه کوي دلته په بريتانيا کې ډيموکراسي کمزورې کړي، زه ډېره په غوصه يم.
د مانچسټر، نيوکاسل، بريسټول او بيلفاست په ګډون په نورو ښارونو کې هم مظاهرې وشوې او شعار يې و: د کودتا مخه ونيسئ.
د پارلمان د ځنډولو لپاره د جانسن اقدام به د پارلمان د وکيلانو لپاره له اروپايي ټولنې د بريتانيا د وتلو پر سر بحث ته وخت رالنډ کړي.
دا اقدام حکومت ته لاره پرانيزي چې د سپټمبر له نهمې د اکتوبر تر ١٤مې پارلمان تعليق کړي.
له اروپايي ټولنې د بريتانيا د وتلو يا برېګزېت لپاره د اکتوبر ٣١مه مهلت ټاکل شوى دى.