ولسمشر اشرف غني پرون یوځل بیا ټینګار وکړ چې د ولسمشرۍ انتخابات به په ټاکلي وخت ترسره کېږي.
په داسې حال کې چې د طالبانو د استازو او امریکايي چارواکو ترمنځ د سولې د نوي پړاو خبرې یوځل بیا د قطر په پلازمېنه دوحه کې پیل شوي، ولسمشر اشرف غني وايي چې د احتمالي سولې هر راز تړون به د افغانستان له حکومت سره کېږي.
د طالبانو د سرچینو په حواله راپورونه وايي چې د افغانستان د سولې لپاره د امریکا د بهرنیو چارو وزارت ځانګړي استازي پرون د طالبانو له استازو سره وکتل.
یوه طالب چارواکي چې په دوحه کې د پرونۍ کتنې له جریانه، پرته له دې چې ګډون پکې ولري، خبر دی خو د خبرو اجازه نه لري، اسوشېټېډ پرېس خبري اژانس ته یې د خپل نوم نه ښودلو په شرط ویلي چې زلمي خلیلزاد په دوحه کې له طالبانو سره د خبرو نوی پړاو پیل کړی.
ښاغلي غني پرون پنجشنبه د سوالونو او ځوابونو په یوه غونډه کې چې د طلوع د خصوصي ټلویزیون په نوښت جوړه شوې وه، په دوحه کې روانو خبرو ته د اشارې په ترڅ کې څرګنده کړه چې د سولې په اړه اساسي پرېکړه به د افغان حکومت په ګډون په راتلونکو خبرو کې کېږي:
ده وویل: هلته په دوحه کې زموږ حضور ضروري نه دی، زموږ حضور په مستقیمو خبرو کې ضروري دی، له موږ پرته څوک د سولې تړون لاسلیکولای شي؟ د یوه دولت او غیر دولتي بنسټ ترمنځ موافقه کوم حقوقي حیثیت لري؟ د متحدایالاتو او ناټو اساسي شریک د افغانستان اسلامي جمهوریت دی چې واضح تړونونه ورسره لري او دا تړونونه د افغانستان د حقوقي بنسټ چې د افغانستان مقننه قوه ده، تصویب کړي دي او د افغانستان لویې جرګې هم تأیید کړي دي.
زلمي خلیلزاد له دې مخکې په اتو پړاوونو کې له طالبانو سره خبرې کړي چې دواړو خواوو یې نتایج مثبت بللي، خو د خبرو په دې ټولو پړاوونو کې افغان چارواکو ګډون نه درلود، ځکه چې د طالبانو مرکچیانو له افغان حکومت سره له مستقیمو خبرو ډډه کړې.
د افغان سولې د مذاکراتو لپاره د امریکا استازی زلمی خلیلزاد
ښاغلي غني وویل، د ده د حکومت اساسي هدف د هغو خنډونو لېرې کول دي چې له طالبانو سره د مستقیمو خبرو پر وړاندې پراته دي.
دی زیاتوي: موافق یم چې خبرې ترسره شي، ځکه زموږ اساسي هدف د هغو خنډونو لېرې کول دي چې د دولت او طالبانو ترمنځ د مستقیمو خبرو پر وړاندې پراته دي چې لومړی یې په هېواد کې د نړیوالو ځواکونو حضور دی، خو له طالبانو سره د پاکستان، د ترورېستي ډلو او د مخدره موادو د قاچاقي شبکو اړیکې یې بل اړخ دی.
د طالبانو هغه چارواکي چې د خپل نوم نه ښودلو په شرط یې له اسوشېټېډ پرېس اژانس سره خبرې کړي، ویلي دي چې ښاغلي خلیلزاد د چهارشنبې په ورځ په قطر کې د طالبانو د سیاسي دفتر له مشر ملا عبدالغني برادر سره هم دوه په دوه وکتل.
خلیلزاد او د طالبانو سرچینو د دې راپور د جوړېدو تر وخته د پرونیو خبرو په اړه رسمي څرګندونې نه دي کړي، خو امریکايي چارواکو او د طالبانو ویندویانو مخکې له دې هیله څرګنده کړې چې ښايي په دې پړاو کې دواړه لوري یوې وروستۍ موافقې ته ورسېږي.