د افغانستان حکومت او په افغانستان کې د مېشتو امریکايي ځواکونو قوماندانۍ د ملکي تلفاتو په اړه د یوناما له رپوټ سره مخالفت څرګند کړی دی.
په کابل کې د ملګرو ملتونو دفتر یوناما نن د جولای په دېرشمه په یوه اعلامیه کې وویل چې د روان کال په لومړیو شپږ میاشتو کې ۱۳۶۶ افغانان وژل شوي او ۲۴۴۶ تنه زخمیان شوي دي.
یوناما ویلي، سره له دې چې دا په ملکي تلفاتو کې د تېر کال په پرتله اووه ویشت فیصده کموالی څرګندوي او دوی یې هرکلی کوي، خو باید ملکي تلفات صفر ته ورسېږي.
یوناما ویلي چې د ملکي تلفاتو ۵۲ فیصده د وسله والوطالبانو، داعش او نورو افراطي ډلو له حملو سره تړاو لري.
یوناما ویلي چې د روان کال په لومړیو شپږو میاشتو کې د وسله والو طالبانو او نورو ډلو د حملو په پرتله د افغانستان د حکومتي ځواکونو او د هغوی د نړیوالو ملاتړ کونکو په عملیاتو کې زیات ملکي خلک وژل شوي او زخمي شوي دي.
د رپوټ اشاره د شپې عملیاتو او هوايي بمباریو ته وه.
د افغانستان حکومت وايي چې وسله وال طالبان عمداً په ملکي سیمو کې پټېږي او له خلکو د سپر په توګه کار اخلي.
د افغانستان د ملي امنیت شورا ویاند نن خبریالانو ته وویل چې د یوناما رپوټ څرګندوي چې د تېر کال په پرتله ملکي تلفات کم شوي او دا ثبوت دی چې د افغانستان امنیتي ځواکونو د ملکي خلکو مصؤنیت ته پام زیات کړی دی.
په افغانستان کې د امریکايي ځواکونو یوه ویاند د یوناما په رپوټ کې له وړاندې شویو ارقامو سره مخالفت کړی دی.
د امریکايي ځواکونو ویاند ویلي چې دوی د حساب ورکولو او دقت لپاره په ډېر لوړ ستندرد کار کوي، څو د ملکي خلکو د تلفاتو مخنیوی وشي.