په میدان وردګ ولایت کې به نن د جولای په شلمه د افغانستان لپاره د سویډن د کمېټې ټول کلینیکونه پرانیستي وي.
د دې مرستندویې ادارې د پروګرامونو مسؤل خالد فهیم ازادي راډیو ته وویل چې هغه کلینیکونه چې څلرویشت ساعته فعالیت لري، پرون لا پرانیستل شوي وو.
خالدفهیم وویل: نوکریوال مسؤلین پرون کلینیکونو ته را وغوښتل شول.
د سویډن کمېټه په میدان وردګ ولایت کې ۷۷ کلینیکونه لري.
فهیم وویل چې کلینیکونه یې د قومي مشرانو په منځګړیتوب او مرسته بېرته پرانیستي دی.
د رپوټونو پر اساس، وسله والو طالبانو د جولای د نهمې په شپه په میدان وردګ ولایت کې د کومانډو ځواکونو د پوځي عملیاتو په غبرګون کې د سویډن کمېټې ته خبرداری ورکړ چې خپل ۴۲ کلینیکونه بند کړي.
د افغانستان د ملي دفاع وزارت ویلي چې په میدان ودرګ ولایت کې د ملکي وګړو د وژل کېدو د خبر په اړه څېړنې کوي.
د دفاع وزارت ویندوی ویلي چې وسله وال طالبان اکثر په ملکي ځایونو کې پټېږي.