د ننګرهار ولايت د دوو جلا جلا عملياتو په نتيجه کې۹۰ کيلوګرامه نشه يي مواد ونيول شول.
د کورنيو چارو وزارت له نشه يي موادو سره د مبارزې معينيت وياند اسدالله يادګاري ازادي راډيو ته وويل، لومړي عملیات په غني خېلو او سره رود ولسواليو کې له نشه يي موادو سره د مبارزې ځانګړو پولیسو وکړل چې په نتيجه کې يې تر شلو کيلوګرامو ډېر چرس او ۲۶ کيلوګرامه تارياک ونيول شول.
په دوهمو عملياتو کې پولیسو د ننګرهار په روداتو ولسوالۍ کې د موټرو د تلاشۍ پر مهال په يوه موټر کې لس کيلو تارياک وموندل چې په پام کې وه يوې ګاونډۍ ولسوالۍ ته قاچاق شي.
د دې دوو پېښو په تور شپږ تنه هم نيول شوي دي.