د امریکا متحده ایالتونو د جبل الطارق په ابنا کې د بریتانیا له خوا د ایران د یوې تېل وړونکې بېړۍ د نیول کېدو هر کلی کړی او دا یې یو ښه خبر بللی دی.
د امریکا د ملي امنیت سلاکار جان بولټن د جولای په څلورمه نېټه پر خپل ټوېټر لیکلي: امریکا او متحدان به یې د تهران او دمشق ترمنځ د تېلو د ممنوع سوداګرۍ مخنیوي ته دوام ورکړي.
د جبل الطارق حکومت چې د بریتانیا اړوند دی، ویلي یې دي چې د بریتانیا شاهي سمندري سرتېري د پنجشنبې په ورځ د (ګریس ۱) په نوم دې کښتۍ ته ننوتل او هغه یې ودروله.
د جبل الطارق د حکومت د بیان پر بنسټ، داسې ښکاري چې دې کښتۍ د ایران خام تېل په سوریه کې د بانیاس د تېلو تصفیه خانې ته انتقالول.
دا تصفیه خانه د اروپايي ټولنې په بندیزونو کې شامله ده.
دا په داسې حال کې ده چې ایران د خپلې دې کښتۍ نیول کېدل غیر قانوني بللي او د بریتانیا پر دې اقدام یې اعتراض کړی دی.
د ایران دولتي خبري اژانس ایرانا د دې هېواد د بهرنیو چارو د وزارت د ویاند عباس موسوي له خولې ویلي چې د پنجشنبۍ په ورځ په تهران کې د بریتانیا سفیر له همدې کبله د اعتراض په توګه احضار شوی و.