د لوګر ولایت د ازرې ولسوالۍ سیمه ییز چارواکي وایی چې په دې ولسوالۍ کې وضعیت تر بل هر وخت خراب شوی دی.
د ازرې ولسوال حمید الله حمید نن ازادي راډیو ته وویل، که د دې ولسوالۍ لارې چې له څو اوونیو راهیسې طالبانو بندې کړي، ژر خلاصې نه شي او خلکو ته مرستې ونه رسېږي، نو ممکن بشری ناورین رامنځته شي.
ښاغلي حمید وویل چې د ازرې ستونزه یې د لوګر له سیمه ییزو او د کابل له چارواکو سره مطرح کړې، خو تر اوسه پورې کوم اقدام نه دی شوی.
ازره د لوګر یوه لېرې پرته ستراتیژیکه ولسوالي ده چې د خیبرپښتونخوا له پاړاچنار سره پوله لري.
د دې ولسوالۍ یو شمېر اوسېدونکو ازادي راډیو ته وویل چې د مواصلاتي لارو د تړل کېدو له امله زښت زیات د خوراکي موادو، درملو او نورو اړینو موادو له کمښت سره مخامخ دي.