د یوې ورځې په تېرېدو سره بیا هم افغان حکومت نهدی توانېدلی چې د تېرې ورځې د انتحاري او وسلهوالې حملې د تلفاتو په اړه دقیق ارقام وړاندې کړي.
د افغانستان دفاع وزارت ویاند روحالله احمدزي د سې شنبې په ورځ ازادي راډيو ته وویل چې په دغې پېښه کې د ملکیانو ترڅنګ د ملي اردو څلور منسوبین هم وژل شوي دي.
تېره ورځ د کابل ۱۶مې ناحیې اړوند د پل محمود خان په سیمه کې له موټر بمب چاودنې وروسته وسلهواله حمله وشوه.
د کورنیو چارو وزارت وايي چې له شااوخوا اووه ساعته نښتې وروسته دغه جګړه د پنځو حمله کوونکو په وژل کېدو سره مازیګر مهال پای ته ورسېده.
په ورته وخت کې د عامې روغتیا وزارت ویاند وحید مایار د پېښې د تلفاتو په اړه ازادي راډيو ته وویل، ملکي روغتونونو ته پنځه ملکي شهیدان او ۱۱۵ ټپيان انتقال شوي.
اخوا د پوهنې وزارت په وینا، په یاده پېښه کې ۵۲ زدهکوونکي هم ټپيان شوي دي.
وسلهوالو طالبانو د دغې حملې مسؤلیت په غاړه واخیست.