د افغانستان د کورنیو چارو وزارت وایي، په ټول هېواد کې پلان شوي جرمونه ۶۰ سلنه او یوازې په کابل ښار کې ۹۰ سلنه کم شوي دي.
د دغه وزارت ویاند نصرت رحیمي د سې شنبې په ورځ په کابل کې یوې خبري ناستې ته وویل، په تېرو څلورو میاشتو کې ۴۸ پلان شوي مجرمان نیول شوي دي.
ښاغلي رحیمي زیاته کړه: "په ټیټه او لوړه کچه پر پلان شويو مجرمانو، د مصونیت کړۍ تنګه شوې ده، یو شمېر مجرمین د پولیسو لهخوا نیول شوي او ډېری له سیمو نه وتلي دي."
دا په داسې حال کې ده چې د سې شنبې د ورځې په سهار عبدالحمید خراساني د پولیسو لهخوا د ۱۰مې امنیتي حوزې اړوندو سیمو کې ونیول شو.
د کورنیو چارو وزارت وايي، خراسانی د هېواد په سطح "لوی او خطرناک مجرم و" او په داسې حال کې ونیول شو چې په غازي ستډیوم کې د جمهوري ریاست د معترضو کاندیدانو غونډي ته روان و.
نصرت رحیمی سخنگوی وزارت داخله افغانستان
د کورنیو چارو وزارت ویاند ازادي راډیو ته وویل، خراساني د دغه وزارت د مجرمینو په هغه لېست کې و چې څو ځلې یې له پولیسو سره نښته هم کړې وه.
د رحیمي په خبره "خراساني د وړو سوداګرو، دکاندارانو او تېل پلورونکو نه د پیسو په اخیستلو، څو سړي تښتونو، غلاګانو، زور ویلو او د هېواد د بیرغ په سوځولو" کې لاس درلود.
رحیمي وویل د ده دوسیه به ډېر ژر بشپړه او لویې څارنوالۍ ته ولېږل شي.
ده دا هم وویل، د هېواد د امنیتي، دفاعي او هوايي ځواکونو د هڅو په نتیجه کې په هیواد کې ۷۰ فیصده ځان وژونکې حملې هم کمې شوې دي.
په ورته وخت کې د امنیتي چارو پوهان وايي، ډېر مجرمین فعال دي او له دې امله پیدا شوې اندېښنې ډېرې دي.
صدیق ساحل وايي: "لنډهغر، سړي تښتوونکي، سړي وژونکي او جنایتکاران همدا اوس په ډېری ولایتونو کې فعال دي. مجرم په دروازه تحقیق ته ننوځي او تېښتې تهیې د کړکۍ له لارې زمینه برابرېږي."
ښاغلی ساحل سربېره پر دې چې د قانون پر حاکمیت ټینګار کوي وايي، له دغه ناوړه وضعیت نه د وتو لپاره باید، په کشفي او امنیتي ارګانونو کې، د امنیتي او نظامي متخصصینو ګمارلو ته ډېر پام وشي.