د هرات ولایت د سوداګرۍ او صنایعو خونه وایي، پهدغه ولایت کې د تازه مېوو حاصلات زیات خو د ساتنې اسانتیاوې نهلري.
د دغه ولایت د سوداګرۍ او صنایعو خونې اجرائیوي امر خلیل احمد یارمند نن د دوشنبې په ورځ ازادي راډيو ته وویل، د سړو خونو د نشتون له امله زیاته تازه مېوه ضایع کېږي:"له بدهمرغه د سړو خونو د نشتون له امله نهشو کولای په خپل وخت له تازه مېوو استفاده وکړو او یا هم په سړو خونو کې یې وساتو، کله چې په بازار کې مېوې کمېږي او موږ یې خلکو ته وړاندې کړو."
ښاغلی یارمند له مرکزي اړونده ادارو پهدغه برخه کې د جدي پاملرنې غوښتنه کوي.
د هرات ولایت د سوداګرۍ او صنایعو خونې د معلوماتو پر بنسټ، د هرات ولایت په ۱۸ ولسوالیو کې مڼې، زردالو، شفتالو، الو بالو، توت او د ګڼو نورو مېوو بڼونه موجود دي.