د افغانستان د سولې لپاره د امریکا ځانګړی استازی زلمی خلیلزاد سیمې ته د خپل اووم سفر په ترڅ کې نن اسلام اباد ته رسېدلی دی.
د پاکستان د بهرنیو چارو وزارت ویاند محمد فیصل پر خپل ټوېټر لیکلي چې د خلیلزاد دا سفر د کابل او اسلام اباد د دوه اړخیزو اړیکو او د افغانستان د سولې په اړه د منظمو سلامشورو یوه برخه ده.
US Special Rep for Afgan Reconciliation Amb Khalilzad and Principle Deputy Assistant Secretary of State, South and Central Asia, Amb Wells arrive in Islamabad, Monday to hold meetings - part of regular consultations, on bilateral relationship & Afghan peace process.
— Dr Mohammad Faisal (@DrMFaisal) April 28, 2019
تر دې مخکې زلمي خلیلزاد د افغانستان له یوه سیمه ییز ټلویزیون طلوع نیوز سره په مرکه کې د افغانستان په وړاندې د پاکستان په دریځ کې پر بدلون نسبي خوشبیني څرګنده کړې وه.
د جنوبي او مرکزي اسیا په چارو کې د امریکا د بهرنیو چارو وزارت مرستیاله الیس ویلز هم له ښاغلي خلیلزاد سره په دې سفر کې ملتیا کوي.
زلمي خلیلزاد چې تېره اوونۍ یې سیمې ته سفر پیل کړی، په بریتانیا، روسیه او افغانستان کې له چارواکو سره تر لیدنو کتنو وروسته اسلام اباد ته ځي.
د نوموړي دا سفر به د مې تر ۱۱مې دوام وکړي.
په عین حال کې د امریکا د مرکزي قوماندانۍ قوماندان جنرال کنيټ مکنزي وايي، دوی دا مهال په افغانستان کې د خپلو او یا نړیوالو ځواکونو د حضور په اړه د بدلون کومه پرېکړه نه ده کړې.
جنرال کنيټ مکنزي د الحره ټولویزیوني شبکې ته په یوه مرکه ویلي، راتلونکې ټولې پرېکړې به په هغو روانو خبرو پورې اړه ولري چې افغان حکومت، د افغانستان خلک او ممکن طالبان په کې برخه ولري.