د سعودي عربستان او ایران په ګډون د عراق د ګاونډیو هېوادونو د پارلمانونو رئیسانو له داعش یا اسلامي دولت ډلې څخه د بېرته نیول شویو سیمو د بیارغولو لپاره د بغداد د هڅو ملاتړ ته تیاری وښود.
د عراق حکومت له څلور کلنې خونړۍ جګړې وروسته پراخې سیمې له داعش څخه بېرته ونیولې.
په دې مناسبت پرون شنبه په بغداد کې د یوې غونډې د پای په اعلامیه کې ویل شوي چې د ګاونډیو هېوادونو د پارلمانونو رئیسان پر داعش له ستر بري وروسته په عراق کې د ثبات، ارامښت، ځمکنۍ بشپړتیا او ټولنیز پیوستون پر ملاتړ ټینګار کوي.
دا اعلامیه چې د اردن، کوېټ، ترکیې او سوریې استازو هم لاسلیک کړې، وايي چې د عراق ثبات د سیمې د ارامښت او ثبات لپاره ضروري دی.