د افغانستان د کرنې او مالدراۍ وزارت وايي چې د کرنیزو محصولاتو د زیاتېدو په هدف یې د هېواد په پنځو زونونو کې د ځمکو د قطريي اوبه کولو ۴۲ شبکې جوړوي.
د دغه وزارت ویاند اکبر رستمي نن ازادي راډیو ته وویل چې دغه شبکې روان لمریز کال په کابل، ننګرهار، هرات او بغلان ولایتونو کې جوړېږي.
ښاغلی رستمي زیاتوي، د ځمکو قطريي اوبه کول د کرنیزو محصولاتو په زیاتېدو سربېره د اوبو له ضایع کېدو مخنیوی هم کېږي.
د کرنې او مالدارۍ وزارت د ویاند په خبره، یاد وزارت په پام کې لري چې په راتلونکو کلونو کې په یو شمېر نورو ولایتونو کې هم دا ډول شبکې جوړې کړي.