د افغانستان د سولې لپاره د امريکا ځانکړي استازي په افغانستان کې د ملګرو ملتونو له استازي او د سیمې د هېوادونو له سفیرانو سره د سولې د روانو هڅو په اړه خبرې وکړې.
په کابل کې د ملګرو ملتونو استازي تداميچي یاماموتو، د سیمې د سفیرانو او د افغانستان د بهرنیو چارو مرستيال وزیر ادریس زمان په حضور کې د سولې د هڅو د ملاتړ پر موضوع خبرې وکړې.
یوناما يا په کابل کې د ملګرو ملتونو مرستندویه ادارې پر ټويټر د دې لیدنې په اړه معلومات خپاره کړي دي.
بل لور ته ښاغلي خليلزاد د ناټو له ملکي استازي نېکلاس کې سره په کابل کې وکتل.
ښاغلي خليلزاد پر ټويټر په يوه پیغام کې پهدې غونډه کې د سولې له بهیره د ملاتړ په خاطر له نېکلاس کې څخه مننه کړې ده.
ده لیکلي چې ناټو هېوادونه ټول یوځای افغانستان ته راغلي وو او پهدې هېواد کې د ناټو د راتلونکي حضور په اړه به یوځایي پرېکړه کوي.
ښاغلي خليلزاد د ناټو متحدانو پر ملاتړ ټينګار وکړ.