راپورونه وايي چې د سوریې په ختیځ کې د عراق سرحد ته نږدې په باغوز ښارګوټي کې اسلامي دولت نومې ډله یا داعش د سوریې د ډموکراتیکو ځواکونو د حملو په وړاندې سخت مقاومت کوي.
باغوز چې د فرات سیند پر غاړه پروت دی په سوریه کې د داعش وروستی پوځي سنګر ګڼل کېږي.
د سوریې ډموکراتیکو ځواکونو چې امریکا یې ملاتړ کوي پرون وویل، د داعش پر ضد دا عملیات به پرېکړوني وي.
د دې پوځي عملیاتو هدف دا دی چې داعش ډله نور نو په سوریه کې قلمرو ونهلري.
د راپورونو له مخې د داعش جنګیالي په سیمه کې کلابند شوي دي.
د اسوشیټېډ پرس خبري اژانس د راپور له مخې تېره شپه باغوز ته د نږدې غونډۍ له سره د داعش د مرکز پر لور د هاوانونو ډزې کېدې او د دې ډزو او هوايي حملو له کبله له ښاره لوخړې پورته کېدلې.
چارواکو ویلي دي چې داعش ډلې په سیمه کې زرګونه ماینونه خښ کړي دي.
د امریکا تر ملاتړ لاندې ځواکونو پهدې سیمه کې پوځي عملیات د جمعې په ورځ له یوې ۱۵ ورځنۍ وقفې وروسته پیل کړل.
دا وقفه د دې لپاره اعلان شوه چې ملکي وګړي له سیمې ووځي.