د افغانستان د کورنیو چارو وزارت د وسلو د لېږد ټول کارتونه او استعلامونه چې تاریخ یې ختم شوي وي، باطل اعلان کړل.
د افغانستان د کورنیو چارو وزارت پولیسو ته لارښونه کړې چې ټولې هغه وسلې چې د ګرځولو جواز یې ختم شوی وي، راټولې کړي.
د دغه وزارت د یوې ابلاغيې له مخې د وسلو د لېږد هغه کارتونه چې پخوا وېشل شوي وو او اوس یې نېټه پای ته رسېدلې ده، باطل شوي دي.
همداشان یاد وزارت د وسلو د لېږد ټول استعلامونه هم باطل اعلان کړي او لارښونه یې کړې چې استعلامونه او وسلې راټولې کړي.
د کورنیو چارو وزارت د ویاندوی د دفتر سرپرست نصرت رحیمي د یکشنبې په ورځ په دې اړه ازادي راډیو ته وویل:
د کورنیو چارو وزارت د ویاندوی د دفتر سرپرست نصرت رحیمي
"د عامه نظم او امنیت د تامین په هدف ټولو برخو ته په جدي ډول هدایت ورکړل شوی، د وسلو د جواز ټول هغه کارتونه چې بېګلې یې موږ مخکې خپرې کړې او هغه کارتونه چې تاریخ یې پای ته رسېدلی، باطل دي، دغه کارتونه دې له وسلو سره د پولیسو له لوري راټول شي."
دا په داسې حال کې ده چې له دې وړاندې د افغانستان د کورنیو چارو وزارت یو شمېر کسانو ته د وسلو د ګرځولو کارتونه او استعلامونه ورکړي وو.
له کورنیو چارو وزارت سره په خوا کې یو شمېر نورو امنیتي ادارو لکه د کابل ګارنیزیون هم ځینو کسانو ته د وسلو د لېږد استعلامونه ورکړي وو.
د کورنیو چارو وزارت په نوې ابلاغیه کې راغلي د وسلو د جواز غوښتونکي کولای شي چې د دغه وزارت د مخکنۍ لارښونې پر بنسټ مخکې ولاړ شي.
په ورته وخت کې د افغانستان د مشرانو جرګې ځیني غړي وايي، په شرایطو نه برابر یو شمېر کسانو هم د وسلو د لېږد جوازونه ترلاسه کړي وو.
همداشان داسې ادعا هم کېږي چې پخوا ځینو کسانو په جعلي کارتونو باندې وسلې ګرځولې.
د مشرانو جرګې نایب منشي فیصل سمیع د یکشنبې په ورځ په دې اړه ازادي راډیو ته وویل:
"په تېر کې په بې درېغه ډول د وسلو کارتونه وېشل شوي وو، یو زیات شمېر چې په شرایطو برابر نه وو د وسلو د لېږد کارتونه یې ترلاسه کړي وو او په دې برخه کې ځانګړی طرزالعمل نه و موجود، په ځینو کارتونو کې جعل کاري هم شوې وه."
خو ښاغلی سیمع سپارښتنه کوي، هغه کارتونه چې په تېر یو کال کې د ځانګړي طرزالعمل له مخې وېشل شوي، باید باطل اعلان نه شي.
د نوموړي په خبره، حکومت له تېر کال راهیسې د یو ځانګړي طرزالعمل له مخې یو شمېر برجسته کسانو ته د وسلې د ګرځولو کارتونه وېشلي چې د کورنیو چارو وزارت د ترورېزم په وړاندې د مبارزې ریاست په ډيټابست کې ثبت دي.
راپور: رحمت الله افغان