بشري حقونو د څارنې نړیوالې ادارې هیومن رايټس واچ د فبرورۍ په شمله په یوه رپوټ کې وویل چې هندي پولیسو په هغه هېواد کې پر مذهبي اقلیتونو د خونړیو حملو په اړه د تحقیقاتو مخنیوی کوي.
د هیومن رایټس واچ دا رپوټ په ۱۰۴ مخونو کې چاپ شوی دی.
په رپوټ کې ویل شوي چې د هند پولیسو حتی د داسې حملو د توجیه کولو لپاره دلایل موندلي او د یو شمېر قربانیانو د کورنیو غړي یې ملامت کړي دي.
د رپوټ په حواله، له ۲۰۱۴میلادي کال راهیسې چې د هند صدراعظم نرېندرا مودي ګوند بهارتیاجناتا پارټي (بي. جي. پي) په قدرت کې دی، د غواوو د ساتنې ډلو پر هغو ټولنو چې د غوا غوښه خوري په بې ساري ډول زیاتې حملې کړې دي.
د هند صدراعظم نرېندرا مودي
په وروستیو درېیو کلونو کې ۴۴ چې لویه برخه یې مسلمانان وو، له دې امله وژل شوي چې د غوا غوښه خوري یا غواوې حلالوي او غوښه یې خرڅوي.
د هند د وګړو په سلو کې اتیا هندوان دي.
د هندوانو په مذهبي عقایدو کې غوا سپېڅلی څاروی دی او په ځیني مواردو کې یې عبادت کېږي.
له دې امله، ډېر هندوان ویجیټېرین دي یا واښه خوري.
د هند یوې وېب پاڼې چې پر مذهبي اقلیتونو د حملو په اړه ارقام را غونډوي، ویلي چې په وروستۍ یوه لسیزه کې د مذهبي کرکې پر اساس نوي فیصده قتلونه د صدراعظم نرېندر مودي د واکمنۍ په کلونو کې شوي دي.
متعصبې مذهبي ډلې پر خلکو په مکرر ډول حملې کوي.
یو شمېر قربانیان په ونو پورې را ځړول شوي، ځیني غرغره شوي او حتی د یو شمېر کسانو سوځول شوي جسدونه هم موندل شوي دي.
هیومن رایټس واچ ویلي، د هند حکومت د دې ستونزې د حل لپاره له صادقانه تحقیقاتو ډډه کړې ده.
د دې سازمان په رپوټ کې د یوې داسې پېښې یادونه شوې چې لا هم نه ده څېړل شوې.
رپوټ وايي، د هند په چهاړکنډ ایالت کې د ۲۰۱۶ میلادي کال د مارچ په اتلسمه د دوو مسلمانانو شپنو مړي وموندل شول چې غوا يې د خرڅلاو لپاره بازار ته بیوه.
د هند یو کروندګر په ځمکه کې په غویانو کار کوي
محمد مظلوم انصاري ۳۵ او امتیاز خان ۱۲ کلن و.
د هغوی جسدونه په یوه ونه پورې را ځړول شوي وو.
د محمد مظلوم پلار هیومن رایټس واچ ته ویلي، کله یې چې پر زوی حمله وشوه، دی له وېرې پټ شو او هر څومره چې یې زوی د مرستې لپاره نارې ووهلې، له مرګه ونه ژغورل شو.
پر دې مسلمانانو د حملې پړه په سیمه کې د مذهبي هندوانو پر یوې ډلې واچول شوه چې د غواوو د مصؤنیت لپاره مبارزه کوي.
هیومن راټيس واچ په دې اړه په رپوټ کې د نورو پېښو مثالونه هم ورکړي او د هند پر پولیسو یې تور پورې کړی چې تقریباً په ټولو مواردو کې یې تحقیقات نه دي کړي او حتی د داسې جنایتونو د پټولو او له قاتلانو سره د مرستې هڅې یې کړې دي.
هیومن رایټس واچ په هند کې پر مرکزي او ایالتي حکومتونو غږ کړی چې د مذهبي اقلیتونو د خونديتوب لپاره د هند د سترې محکمې هغه حکم چې په ۲۰۱۸ میلادي کال کې یې صادر کړی، عملي کړي.
په دې حکم کې د هغو کسانو لپاره چې په ډله ییز ډول حملې کوي، سزا ټاکل شوې ده.