د افغانستان د سولې د پروسې لپاره د امریکا د بهرنیو چارو د وزارت ځانګړی استازی زلمی خلیلزاد د سولې یوې موافقې ته بیړه لري.
زلمي خلیلزاد له تېرې سپټمبر میاشتې راهیسې د خپل کار تر پیلولو وروسته تر اوسه پورې څو ځله له طالب استازو سره خبرې کړې دي.
خلیلزاد د طالبانو اساسي غوښتنه چې له افغانستانه د امریکايي سرتېرو وتل دي، منلې ده او طالبانو نوموړي ته ډاډ ورکړی دی چې د سولې په صورت کې به د افغانستان خاوره د امریکا او یا بل کوم هېواد پر ضد نهاستعمالېږي او ترورېستی ډلو ته به پر افغان خاوره د فعالیت اجازه ورنهکړي.
د اسوشیټېډ پرس خبري اژانس وايي، د افغانستان د سولې یوې موافقې ته د زلمي خلیلزاد بیړه د افغانستان د جګړې په اړه چې د امریکا په لوی ځاني او مالي لګښت تمامېږي، د ولسمشر ټرمپ له مأیوسۍ سرچینه اخلي.
د افغانستان د سولې د پروسې لپاره د امریکا د بهرنیو چارو د وزارت ځانګړی استازی زلمی خلیلزاد
زیات شمېر کتونکي په دې باور دي چې له افغانستانه د امریکا او ناټو د ټولو ځواکونو وتل به افغان حکومت چې کمزوری بلل کېږي او په اداراتو کې يې د پراخ فساد ادعا کېږي، له بحران او یا به افغانستان له یوې بلې جګړې سره مخامخ کړي.
د افغانستان د سولې د موافقې لپاره زلمی خلیلزاد نهیوازې له طالبانو سره خبرې کوي، بلکې نوموړی له پاکستان سره هم غږېږي چې ویل کېږي د طالبانو مشرانيې ساتلي دي او ملاتړ يې کوي.
که څه هم لا د سولې د موافقې پوره او دقیق جزئیات معلوم نهدي، خو ښاغلي خلیلزاد ویلي دي چې امریکا په افغانستان کې د ښځو حقونو، د قانون حاکمیت او د بیان ازادۍ ته ژمنه ده، خو د نوموړي په وینا، پر دې مسئلو به په خپله افغانان په خپلو کې خبرې او پرېکړې کوي.
افغان ولسمشر محمد اشرف غني چې حکومتيې تر ډېره د امریکا او طالبانو ترمنځ د خبرو په روانه پروسه کې بهر پاتې دی، د سولې د یوې داسې موافقې مخالفت کوي چې په بیړه وي، په افغانستان کې موقت حکومت ته زمینه برابروي او یا د ولسمشرۍ راتلونکي انتخابات نور هم ځنډوي.
افغانان د سولې د یوې داسې موافقې هرکلی کوي چې په افغانستان کې امنیت او ثبات راولي، خو په ورته وخت کې دا اندېښنه هم لري چې په بیړه سوله کول او د ټولو امریکايي سرتېرو وتل به په دې هېواد کې د کورنۍ جګړې یوه بله څپه پورته کړي.
اسوشیټېډ پرس خبري اژانس دې پوښتنې ته په ځواب کې چې ایا په افغانستان کې سوله ممکنه ده او که نه؟ لیکلي:
"که څه هم امریکا او طالبان دواړه وايي چې په روانو خبرو کې زیات پرمختګ شوی دی، خو لا هم کومه موافقه نهده شوې."
دا هم روښانه نهده چې د سولې د موافقې په صورت کې به طالبان له امریکا سره د ژمنې پر اساس وغواړي او یا به وکولای شي چې د القاعده او داعش په ګډون هغه وسلهوالې ډلې وځپي چې همدا اوس له افغان حکومت او په خپله له طالبانو سره جګړه کوي.