د امریکا د خزانې وزارت پر ایران د نویو فشارونو په لړۍ کې د قدس ځواک سره پر ملیشه ډلو- فاطمیون او زینبیون او همداراز له ماهان هوايي شرکت سره پر تړلي قِشم فارس ایر هوايي شرکت او د ارمنستان پر یوه مسافرتي شرکت بندیزونه لګولي.
فاطمیون له افغانانو او زینبیون له پاکستانیانو جوړې ملېشه ډلې دي چې د حرم د مدافعینو په نوم یادېږي او د ایران د رژیم په ګټه په سوریه کې جګړه کوي.
د دې ډلو څه باندې دوه زره غړي تراوسه د سوریې په جګړه کې وژل شوي دي.
د امریکا د خزانې وزیر سټیفن منوچين پرون د بندیزونو د اعلان په بیان کې وویل، د ایران رژیم په دې هېواد کې دېره کډوال له خپلو حقونو محروموي او په سوریه کې یې جنګوي.
ایران د امریکا د نویو بندیزونو په اړه عکس العمل نه دی ښودلی، خو ویلي یې دي چې ځواکونه یې د بشار الاسد د رژیم په خوښه په سوریه کې دېره دي.