اډيلیډ سټرایکرز کرکټ لوبډلې د افغان لوبغاړي راشد خان په مټ په بېګ باش کې خپله لومړۍ لوبه وګټله.
سټرایکرز د برسبین هیټ له خوا د ۱۴۷ منډو هدف په ۱۹ اوور کې د پنځو لوبغاړو په سوځېدو پوره کړ.
راشد خان درې ویکټې واخېستې او د لوبې غوره لوبغاړی شو.
د برسبین هیټ لپاره هم افغان ځلمکي بالر مجیب الرحمن لوبه وکړه چې دا وار یې د ویکټو اخېستلو پر ځای منډې وکړې او ۲۷ منډې یې خپل ټیم ته جوړې کړې.
د اسټرالیا د کرکټ شل اووریزې تجارتي سیالۍ د چهارشنبې په ماښام پیل شوې.