د امریکا ولسمشر د دې هېواد د بهرنیو چارو د وزارت ویانده هدر ناوئرټ په ملګرو ملتونو کې د امریکا د سفیرې په توګه نوموي.
امریکايي رسنیو په دې اړه راپورونه خپاره کړي او ویلې یې دي چې ولسمشر ټرمپ ښايي نن پر خپل ټویټر د نوموړي نومول رسماً اعلان کړي.
هدر ناوئرټ به چې د «سي. اېن.اېن» او فاکس نیوز ټلوېزیوني شبکو د یوې مخکښې خبریالې په توګه یې هم کار کړی، په ملګرو ملتونو کې د نیکې هیلې ځای ونیسي.
نیکې هیلې د اکټوبر په میاشت کې اعلان کړی و چې د روان میلادي کال په پای کې به په ملګرو ملتونو کې د امریکا د سفیرې په توګه له خپلې دندې استعفا وکړي.
۴۸ کلنه هدر ناوئرټ چې د۲۰۱۷ میلادي کال په اپریل میاشت کې د امریکا د بهرنیو چارو د وزارت ویانده ټاکل شوې وه د روان میلادي کال په لومړیو کې د بهرنیو چارو وزارت د عامه اړیکو او ډیپلوماسۍ د چارو د مرستیالې دنده هم ور وسپارل شوه.