د ملګرو ملتونو عمومي منشي وایي، د پاریس د ۲۰۱۵ کال له کنفرانس وروسته په نړۍ کې د اقلیم د بدلون په اړه د نړیوالو سیاسي اراده کمزورې شوې ده.
انتونیو ګوترش دغه څرګندونې پرون دوشنبه د پولنډ په کاتوویڅې کې د ملګرو ملتونو د اقلیم سرمشریزې ته په پرانيستونکې وینا کې وکړې.
دغه سرمشریزه به چې دوه اوونۍ دوام کوي، د نړۍ د څه باندې سلو هېوادونو او سازمانونو استازو پهکې ګډون کړی دی.
ګوترش وویل، په نړۍ کې د اقلیم د بدلون واقعیت دا دی چې هغه د تمې خلاف په ناوړه حالت کې دی، خو د پاریس له کنفرانس وروسته سیاسي اراده کمزوې شوې ده.
د پاریس په کنفرانس کې په دې سلا شوې وه چې د ځمکې تودوخه باید له دوو درجو زیاته نهشي.